Hrefnuveiðin að hefjast

Nýr hrefnuveiðikvóti verður gefinn út með reglugerð landbúnaðar- og sjávarútvegsráðuneytisins í dag og er gert ráð fyrir að fyrstu bátar farið til veiða á næsta sólarhring.

Að sögn Stefáns Ásmundssonar, skrifstofustjóra í landbúnaðar- og sjávarútvegsráðuneyti, er ákvörðunin í beinu framhaldi af ákvörðun sem var tekin árið 2006 um að heimila hrefnuveiðar að nýju. Stefán segir að gert sé ráð fyrir að um 40 dýr verði veidd og er gert ráð fyrir að afurðir verði seldar á innanlandsmarkaði.

Á vef Hrefnuveiðimanna segir að hrefnuveiðibáturinn Njöður KÓ muni fara fyrstur til veiða og verði fram á sumar. Bátarnir Dröfn RE og Halldór Sigurðsson ÍS komi til veiða um mitt sumar. Til stendur að kjötið af veiðunum verði komið í verslanir fyrir næstu mánaðarmót og verður það kjötvinnslan Esja sem mun sjá um vinnslu, pökkun og markaðsetningu á kjötinu. Frá árinu 2004 hafa hrefnuveiðimenn sjálfir séð um dreifingu og markaðsetningu á kjötinu.