„Í samræmi við það sem við höfum sagt“

„Við getum ekki annað fagnað þessari niðurstöðu, Þetta er í samræmi við það sem við höfum sagt," segir Aldís Hafsteinsdóttir, bæjarstjóri í Hveragerði, um álit Skipulagsstofnunar vegna Bitruvirkjunar. Stofnunin telur að bygging Bitruvirkjunar á Hengilssvæðinu sé ekki ásættanleg vegna verulegra neikvæðra og óafturkræfra áhrifa á landslag, útivist og ferðaþjónustu.

Aðspurð hvort um fullnaðarsigur sé að ræða hjá þeim sem barist hafi gegn virkjuninni segir Aldís: „Ég tel að það sé afskaplega erfitt að reisa virkjun á þessu svæði þegar þessi úrskurður liggur fyrir." Hún bendir á að bæjarstjórn Hveragerðis hafa allan tímann tekið einarða afstöðu gegn virkjuninni og talið að með henni sé verið að fórna meiri hagsmunum fyrir minni.

Þá bendir hún á að Hvergerðingar hafi haft allnokkrar áhyggjur af loftgæðum þar sem loftmengun frá virkjuninni muni berast yfir bæinn í ríkjandi vindátt. „Þannig að það eru þarna ákveðnir óvissuþættir sem sýna það að álit bæjarstjórnar er ekki gripið úr lausu lofti," segir Aldís.

Bæjarstjórinn hefur mikla trú á Hengilssvæðinu fyrir ferðaþjónustuna. Hún bendir á að í erlendum ferðahandbókum séu gönguleiðir um svæðið tilgreindar sem helsta aðdráttarafl svæðisins og hún hafi fengið þær upplýsingar hjá upplýsingamiðstöð ferðaþjónustunnar að mikill áhugi sé fyrir svæðinu, fólk sæki mikið upp í Klambragil og heita lækinn. „Í þessu felst okkar auðlind og við verðum að vernda hana, ekki síst fyrir börn okkar og komandi kynslóðir," segir Aldís.