Lögregla stöðvaði framkvæmdir á vegum Ísafjarðabæjar

Nokkrar deilur hafa staðið milli Ísafjarðarbæjar og Hestamannafélagsins Hendingar vegna lagningar vegar yfir reiðvöll félagsins. Vegurinn er hluti af jarðgöngum sem fyrirhuguð eru til Bolungarvíkur. Ekki hefur náðst samkomulag um greiðslu bóta vegna reiðvallarins og var lögregla kölluð til og stöðvaði framkvæmdir á laugardaginn. Halldór Halldórsson bæjarstjóri á Ísafirði vonar að sátt náist í málinu.

Forsaga málsins er sú að Hestamannafélagið hefur verið með hesthús og íþróttaaðstöðu í Hnífsdal í tæplega þrjátíu ár. Þegar ákveðið var að fara í að bora göng til Bolungarvíkur kom í ljós að gert er ráð fyrir að vegurinn sem liggur að göngnum fari yfir hluta reiðvallar sem Hestamannafélagið á.

Ísafjarðarbær hefur þegar náð samkomulagi við hestamenn um uppkaup á hesthúsum á svæðinu og bauð þeim aðstöðu í Engidal í Skutulsfirði í staðinn. Hestamenn vilja hins vegar einnig fá bætur fyrir reiðvöllinn.

„Við buðum þeim að reisa reiðvöll á nýja svæðinu og það tilboð hefur legið fyrir lengi. Þeir eru með einhverjar hugmyndir um að reisa reiðhöll og vilja nota bæturnar upp í þá framkvæmd. Þeirra mat á reiðvellinum er hinsvegar þrisvar sinnum hærra en okkar mat," segir Halldór en bæjarstjórn frestaði að gefa út framkvæmdarleyfi vegna vegalagningarinnar þann 2.apríl sl. vegna þess að ekki hafði náðst sátt í málinu með reiðvöllinn.

Á laugardaginn kölluðu hestamenn síðan til lögreglu sem stöðvaði framkvæmdir á svæðinu. „Við beittum fyrir okkur pólitíinu svo við værum marktækir, þetta var nú allt gert í mestu vinsemd," segir Marinó Hákonarson, formaður hestamannafélagsins, sem staðfestir að deilan snúist um krónur og aura vegna reiðvallarins.

Halldór Halldórsson bæjarstjóri á Ísafirði vill þó meina að framkvæmdir hafi ekki verið hafnar.

„Í fyrra voru þeir að skafa jarðveg frá berginu til þess að athuga með þykkt og annað. Þá fór einhver jarðvegur yfir endann á reiðvellinum," segir Halldór og bendir á að á laugardaginn hafi verktakinn einungis verið að koma sér fyrir á svæðinu enda vilji hann hefjast handa sem fyrst.

„Það voru engar framkvæmdir við vegalagninguna farnar í gang."

Halldór er þó ekki í vafa um að málið muni leysast. „Fyrst það ber svona mikið á milli þá verðum við bara að kalla til dómskvadda matsmenn, þetta leysist að lokum eins og öll svona mál."