Lögreglan klippir skráningarnúmer af bílum

Töluvert er um ótryggð og óskoðuð ökutæki á höfuðborgarsvæðinu en lögreglan hvetur eigendur og umráðamenn þeirra til að gera þar bragarbót á.

Undanfarið hafa skráningarnúmer verið fjarlægð af allnokkrum ökutækjum sem uppfylltu ekki ákvæði um skoðun eða voru ótryggð. Lögreglan heldur eftirlitinu áfram og hvetur ökumenn til að passa upp á þetta svo ekki þurfi að koma til fyrrnefndra aðgerða.

Í gær voru skráningarnúmer fjarlægð af nálægt tuttugu ökutækjum sem voru ýmist óskoðuð eða ótryggð, og jafnvel hvorutveggja, en trassaskapur sumra í þessum efnum er með ólíkindum.

Þetta kemur fram í tilkynningu frá lögreglunni.