Óskar Bergsson lenti í óveðri á Landsmóti

Óskar Bergsson er mikill útivistarmaður og hefur varið sumrinu bæði á hestbaki og með því að ganga Laugaveginn ásamt fjölskyldu sinni. Óskar mætti galvaskur á Landsmót hestamanna, sem haldið var fyrr í mánuðinum.

„Ég var allan tímann þannig að ég lenti í alls kyns veðri," segir Óskar í samtali við Vísi. Eins og glöggir menn muna blés all hressilega í upphafi Landsmóts og var á tímabili óttast mikið um tjöld og lauslega hluti sem voru á svæðinu. Það lægði þegar leið á og segist Óskar hafa skemmt sér vel á mótinu.

Óskar hyggst svo ferðast um hálendið núna um Verslunarmannahelgina.

Vísir hóf í síðustu viku greinaflokkinn „Borgarfulltrúar í sumarfríi", þar sem borgarfulltrúum gefst tækifæri á að tjá sig um önnur og léttari málefni en, skipulagsráð, REI málið og tíð borgarstjórnarskipti. Svandís Svavarsdóttir reið á vaðið og sagði frá ferð sinni til Flateyrar, Þorbjörg Helga Vigfúsdóttir sagði frá skemmtilegri ferð sinni til Spánar og Frakklands. Loks sagði Dagur B. Eggertsson frá ferð sinni um hringveginn með fjölskyldu sinni.