Dagur klappaði hreindýrskálfi

Dagur B. Eggertsson, fyrrverandi borgarstjóri, var staddur á Eskifirði þegar Vísir hafði samband við hann í morgun. Hann er ásamt konu sinni og tveimur börnum þeirra á hringferð um landið í sumarfríi sínu. Hann segir að bongóblíða hafi verið á Austfjörðum í dag.

„Við vorum rétt í þessu að klappa hreindýrakálfi," sagði Dagur. Borgarfulltrúinn geðþekki sagði að kálfurinn væri mjög spakur. Hann hefði orðið viðskila við móður sína, en góðhjörtuð fjölskylda á bæ í Reyðarfirði hefði tekið hann að sér.

Dagur segir að fjölskyldan hyggi ekki á utanlandsreisu í sumar. „Við fórum til tengdaforeldranna í Svíþjóð í júní, en það eru engin stærri plön," segir Dagur. Hann segist hafa átt frábært sumarfrí en vinnan taki svo við eftir verslunarmannahelgi.

Vísir hóf í síðustu viku greinaflokkinn „Borgarfulltrúar í sumarfríi", þar sem borgarfulltrúum gefst tækifæri á að tjá sig um önnur og léttari málefni en, skipulagsráð, REI málið og tíð borgarstjórnarskipti. Svandís Svavarsdóttir reið á vaðið og sagði frá ferð sinni til Flateyrar og Þorbjörg Helga Vigfúsdóttir sagði frá skemmtilegri ferð sinni til Spánar og Frakklands.