Baðst afsökunar á framgöngu í fjölmiðlum

Magnús Skúlason, arkitekt og fulltrúi F-listans í skipulagsráði Reykjavíkurborgar, hefur trú á því að samkomulag náist um að Listaháskóli Íslands rísi á Frakkastígsreit við Laugaveg en að gera þurfi ákveðnar breytingar á byggingunni. Magnús bað aðstandendur skólans afsökunar á hvað hann hefði verið hvassyrtur í fjölmiðlum á fundi í dag.

Fundur var í skipulagsráði í morgun og á þann fund komu fulltrúar Listaháskólans, Samson og +Arkitekta sem teiknuðu skólann. Þar kynntu þeir hugmyndina og var ákveðið að þeir myndu funda með skipulagsstjóra um framhaldið og reyna að ná sátt í málinu.

Ólafur F. Magnússon borgarstjóri hefur lýst sig andsnúinn tillögu um bygginguna eins og hún lítur út núna og vill að tekið verði meira tillit til götumyndar Laugavegarins. Þeirri skoðun deilir Magnús Skúlason sem í morgun sat sinn fyrsta fund sem fulltrúi F-listans í skipulagsráði. Hann kom þar inn eftir að borgarstjóri hafði vikið Ólöfu Guðnýju Valdimarsdóttur úr ráðinu vegna ágreinings.

Telur að samkomulag náist um Listaháskólann

Magnús sagði að fulltrúar þeirra aðila sem standi að byggingunni hafi kynnt hana. Hann segist hafa haft sig lítið í frammi á fundinum en að tillagan sé mjög merkileg. „Ég hef hins vegar líka lagt áherslu á götumynd Laugavegarins samanber málefnasamning núverandi meirirhluta," segir Magnús.

Magnús viðurkenndi aðspurður að hann hefði beðið þá aðila sem kynntu tillöguna afsökunar á því hversu hvassyrtur hann hefði verið í fjölmiðlum. „Minn karakter er þannig. Mér brá við að sjá þessi hús hverfa," segir Magnús.

Aðspurður hvort hann telji að Listaháskólinn rísi við Laugaveg segir Magnús að hann sjái það alveg fyrir sér en þó þurfi að gera breytingar á tillögunni. „Það þarf að vinna þetta frekar og ég held að það sé fullur vilji til þess af hálfu beggja aðila," segir Magnús. Málið sé nú í faglegu ferli og hann hafi trú á því að niðurstaða náist í því.