Ramos útilokar ekki brottför Keane og Berbatov

Juande Ramos, stjóri Tottenham, hefur nú tjáð sig um þrálátan orðróm þess efnis að þeir Robbie Keane og Dimitar Berbatov séu á leið frá félaginu.

Ramos er nú með sína menn í stífum æfingabúðum í grennd við Valencia á Spáni og hann segist ekki missa svefn yfir sífelldu slúðri blaðanna um leikmenn sína.

Dimitar Berbatov hefur verið þrálátlega orðaður við Manchester United og nú síðast Barcelona - á meðan því hefur verið slegið föstu að Robbie Keane sé á leið til Liverpool.

"Við verðum að sjá hvað gerist í þessum málum en við erum að tala um tvo mjög mikilvæga leikmenn í liðinu. Þeir eru hjá okkur sem stendur, en hvað sem öðru líður stefnum við á að gera betur á næsta tímabili. Stefna okkar hefur alltaf verið að byggja á yngri leikmönnum og ef við fáum tilboð í þá eldir - hugsum við alltaf um hvað sé félaginu fyrir bestu," sagði Ramos.

Tottenham fór eftir þessari stefnu í sumar þegar það keypti miðjumanninn Luka Modric og hinn unga Giovani Dos Santos frá Barcelona.

"Við keyptum Modric fyrir EM af því við vissum að hann myndi auka verðgildi sitt á mótinu og við reiknum með því að hann eigi eftir að hjálpa okkur mikið. Það sama var uppi á teningnum með Giovani og við vonum að þessir menn hjálpi okkur að keppa við bestu liðin í baráttunni um Evrópusæti," sagði Ramos í samtali við AS á Spáni.