Lífeyrissjóðslán verði fryst

Stjórn Landssamtaka lífeyrissjóða skipaði um miðjan október starfshóp til að fjalla um greiðsluvanda sjóðfélaga og tillögur til úrbóta. Hópurinn hefur lokið störfum og skilaði fyrir helgi tillögum sem meðal annars miða að því að frysta lán hjá sjóðsfélögum í sex mánuði til að byrja með. Stjórn Landssamtakanna hefur samþykkt tillögurnar og ákveðið að gera þær að sínum. Þær hafa nú verið sendar til hlutaðeigandi lífeyrissjóða til umfjöllunar.

„Landssamtök lífeyrissjóða beina því til lífeyrissjóðanna að bjóða sjóðfélögum í greiðsluerfiðleikum að „frysta" lífeyrissjóðslán sín í sex til tólf mánuði, til að byrja með, með því að breyta lánaskilmálum tímabundið," segir í tilkynningu.

„Þá mælast Landssamtökin til þess að lífeyrissjóðir taki upp nánara samstarf við Ráðgjafarstofu um fjármál heimilanna til að auðvelda sjóðfélögum í vanda að fá heildstæða mynd af stöðu sinni og hvaða leiðir séu til ráða. Ennfremur efli lífeyrissjóðir upplýsingamiðlun til þeirra sem eru í vanda staddir eða eru að kanna sjálfir hvernig þeir eigi að komast hjá því að lenda í fjárhagsvandræðum," segir einnig.

Tillögurnar má kynna sé nánar í skjali hér að neðan.