Íbúðalánasjóður verður ekki heildsölubanki

Húseigendur sem eiga tvær eignir og geta ekki selt aðra fá að fresta greiðslum af lánum frá Íbúðalánasjóði. Félagsmálaráðherra segir ekki standa til að gera Íbúðalánasjóð að heildsölubanka sem ekki láni til almennings.

Íbúðalánasjóður tikynnti þetta í dag. Samkvæmt þessu heimilar sjóðurinn að eigendur tveggja fasteigna sem eru að reyna að selja aðra þeirra, en geta ekki, frestað afborgun af lánum af eigninni og sem og hinni einnig. Sama rétt eiga þeir sem eru að byggja og eru með lán frá sjóðnum á nýbyggingunni og eða eign sem viðkomandi á fyrir og getur ekki selt.

Geir H. Haarde, forsætisráðherra, sagði í viðtali í vikunni að Íbúðalánasjóður yrði gerður að heildsölubanka. Jóhanna Sigurðardóttir, félagsmálaráðherra, segir samhljóm í skoðunum hennar og forsætisráðherra.