Sérstakri fartölvu stolið frá Opnum kerfum

Síðastliðna nótt, aðfaranótt 25. júlí, var brotist inn í Verslun Opinna kerfa að Höfðabakka 9. Höfðu innbrotsþjófarnir á brott með sér nokkrar HP fartölvur, þar á meðal tölvur úr nýrri línu sem kynnt hefur verið fyrir skólavertíðina sem hefst á næstu vikum.

Í fréttatilkynningu frá Opnum Kerfum segir að ein af þeim tölvum sem þjófarnir höfðu á brott með sér skeri sig nokkuð úr, því engin slík tölva hefur verið seld enn sem komið er á Íslandi.

„Um er að ræða MTV útgáfu af HP Pavilion fartölvu og er hún nokkuð skrautleg eins og meðfylgjandi mynd ber með sér."

Lögreglan á höfuðborgarsvæðinu og starfsfólk Opinna kerfa vilja biðja fólk að hafa opin augun og tilkynna tafarlaust til lögreglu ef vart verður við tölvuna eða aðila sem eru að selja nýjar HP fartölvur.