Iceland Express fá tvær Boeing 737-700 vélar

Iceland Express mun í september taka í notkun tvær Boeing 737-700 flugvélar. Vélarnar eru mun sparneytnari og umhverfisvænni en þær flugvélar sem félagið hefur fram að þessu notað í millilandaflugi og eyða allt að 40% minna eldsneyti á hvern flugtíma en þær vélar sem félagið er nú með í notkun.

Samningurinn markar tímamót í sögu Iceland Express þar sem allar vélar Iceland Express verða annað hvort Boeing 737 eða 757 vélar. Það gerir það að verkum að allt viðhald og öll þjálfun áhafna verður einfaldari. Þá þykja Boeing 737 vélarnar þær traustustu í heiminum og auðveldar í notkun.

Boeing 737-700 vélarnar munu hefja flug fyrir Iceland Express í september og eru þær nokkuð nýlegar. Það er Astreus Airlines, systurfélag Iceland Express sem á og rekur vélarnar sem koma í stað MD90 vélanna sem flogið hafa fyrir Iceland Express.