Héraðsdómur braut Barnasáttmála SÞ

Héraðsdómur Norðurlands Eystri braut Barnasáttmála Sameinuðu þjóðanna með sýknudómi yfir karlmanni, sem ítrekað beitti unga drengi líkamlegu ofbeldi. Þetta er mat Barnaheilla, sem sjá ástæðu til að hvetja Alþingi til að endurskoða barnaverndarlögin.

Karlmaðurinn var kærður fyrir líkamsárás og brot á barnaverndarlögum, eftir að hafa ítrekað beitt tvo drengi 4 og 6 ára líkamlegum refsingum eða flenginginum. Hann var fyrir Héraðsdómi Norðurlands eystra, sýknaður af báðum ákærum.

Í dómnum segir meðal annars að almennt séð varði það við almenn hegningarlög að slá mann nauðugan á rassinn með flötum lófa svo að undan roðnar.

,,Til þess sé hins vegar að líta að hugsanlega tíðkist eitthvað, eða hafi tíðkast, að flengja börn. Verði að gæta að því að ekki verði öðru vísi litið á en að ákærði hafi flengt drengina með samþykki móður þeirra, í tilefni af því að þeir höfðu sýnt af sér óþekkt, þótt ekki liggi fyrir í hverju hún hafi falist."

Jónína vísar hvort tveggja til Barnasáttmála Sameinuðu þjóðanna og Barnaverndarlaga og segir dóminn ganga gegn ákvæðum þeirra.

Þau séu nægilega skýr til að dæma drengjunum í vil. Þar segir meðal annars "Hver sem beitir barn refsingum, hótunum eða ógnunum og ætla má að slíkt skaði barnið andlega eða líkamlega skal sæta sektum eða fangelsi allt að þremur árum."

Það er mat Barnaheilla að kveði lögin ekki nógu skýrt á um bann við líkamlegum refsingum þurfi að endurskoða þau, þannig að enginn vafi leiki á að líkamlegar refsingar séu ekki leyfðar hvorki í uppeldislegum tilgangi né öðrum.