Álver komi á réttum tíma

Afstaða fólks til byggingar álvers í Helguvík byggist á mörgum þáttum og er efnahagsástandið ein helsta skýringin, að mati Kristins H. Gunnarssonar, þingmanns Frjálslynda flokksins. Hann segir að það komi sér ekki alveg á óvart að um 65% landsmanna séu andvígir fyrirhuguðu álveri, eins og könnun Gallup bendir til.

„Nú er verðbólga og þensla og ég held að margir vilji að náð verði tökum á efnahagsástandi áður en að farið verði í frekari framkvæmdir," segir Kristinn. Hann segir jafnframt að ef harðna fari á dalnum og atvinnuleysið aukist þá muni afstaða fólks breytast. Kristinn segir að Frjálslyndi flokkurinn sé hlynntur álveri á Bakka og í Helguvík en bíða þurfi þess að það slakni á efnahagslífinu.