Hversu mikilvægur er Frank Lampard?

Miðjumaðurinn Frank Lampard hjá Chelsea hefur verið orðaður við Inter Milan á Ítalíu allar götur síðan Jose Mourinho tók þar við stjórnartaumunum.

Síðast í dag viðurkenndi Mourinho á blaðamannafundi að hann hugsaði mikið um leikmanninn sem fór fyrir sigursælu Chelsea-liði hans árin 2005-06, en bætti við að á meðan Chelsea vildi ekki selja hann - þýddi lítið að velta sér upp úr því.

Lampard hefur sannarlega verið mikilvægur hlekkur í miðjuspili Chelsea síðustu ár og samkvæmt tölfræði Opta virðist hann vera liði sínu ansi dýrmætur.

Chelsea vann þannig 71% leikja sinna þar sem Lampard spilaði, en var aðeins með 57% vinningshlutfall þegar hann lék ekki með. Þetta er talsverður munur fyrir lið sem er í toppbaráttu.

Chelsea tapaði aðeins einum deildarleik með Lampard innanborðs á síðustu leiktíð, en liðið tapaði tveimur af þeim fjórtán leikjum sem hann missti af.

Hann var markahæsti leikmaður liðsins með 10 mörk í deildinni og liðið skoraði 2,13 mörk í leik þegar hann spilaði og það er meira en helmingi hærra hlutfall en þegar hann spilaði ekki.

Chelsea fékk tvö stig að meðaltali í leik þegar Lampard var ekki með, en þetta hlutfall hækkaði upp í 2,38 stig að meðaltali þegar miðjumaðurinn sterki var með.