Vilja að starfsfriður skapist til framtíðar á Landspítala

„Stjórn Félags íslenskra hjúkrunarfræðinga (Fíh) skorar á stjórnendur Landspítala að fresta nú þegar fyrirhuguðum breytingum á vaktafyrirkomulagi hjúkrunarfræðinga á skurð- og svæfingadeildum spítalans og afstýra þannig því neyðarástandi sem skapast ef stærstur hluti skurð- og svæfingahjúkrunarfræðinga lætur af störfum um næstu mánaðarmót.“ Þetta kemur fram í tilkynningu frá samtökunum.

Jafnframt skorar stjórn Fíh á stjórnendur Landspítala að leita samstarfs við hjúkrunarfræðingana um mögulegar breytingar á vaktafyrirkomulaginu þannig að starfsfriður skapist til framtíðar og öryggi sjúklinga verði áfram tryggt.