Myndar íslenska hryðjuverkamenn

„Ég er að fara að mynda hryðjuverkamenn. Það er víst mikið af þeim hérna, en þeir virðast vera dulbúnir sem ungabörn og gamalmenni," segir ljósmyndarinn og „hryðjuverkamaðurinn" Þorkell Þorkelsson.

Ástæða þessarar óvenjulegu myndatöku Þorkels er ákvörðun breskra yfirvalda að beita hryðjuverkalögum til að frysta eignir íslensku bankanna í Bretlandi. Gjörning sem hann segir hafa valdið íslensku þjóðinni og ímynd Íslands á alþjóða vettvangi ómældum og óbærilegum skaða.

„Ég var bara svo móðgaður yfir þessu þegar Brúnn og Ljúflingur settu þessi lög á okkur. Eitt kvöldið var ég svo reiður að ég gat varla sofnað, og vaknaði svo morguninn eftir með þessa hugmynd til að sýna hvers lags óþjóðalýður býr hér," segir Þorkell.

Á miðvikudaginn ætlar hann að bjóða landsmönnum, sem þurfa að sitja undir þessum hryðjuverkastimpli, að láta mynda sig með „vopn sín" hver svo sem þau eru. Börn með snuðin sín, smiðir með hamra, skrifstofublókir með penna, hárskerar með kamb og svo framvegis. „Svona Íslandshreyfing Al Kaída," segir Þorkell og ítrekar að afar mikilvægt sé að allir mæti „vopnaðir."

Þorkell hefur töluverða reynslu af því að starfa á stríðssvæðum, þar á meðal í Írak, Afganistan og ýmsum Afríkuríkjum, og segist þess vegna treysta sér í þetta stórhættulega verkefni. „Ég fer bara í skothelda vestið og reyni að hafa opnar dyr sem ég get skotist út um," segir Þorkell kíminn.

Myndatakan fer fram á næstkomandi miðvikudag í húsnæði Sönglistar í Borgartúni 1, gegnt Rúgbrauðsgerðinni. Þorkell reiknar með því að vera að störfum meira og minna allan daginn, og vill sérstaklega hvetja Breta sem eru búsettir hér til að mæta. „Þessu er ekki beint gegn Bretum," segir Þorkell. „Bretar eru vinir okkar. Það eru bara þessir labbakútar Ljúflingur og Brúnn sem við þurfum að ulla svolítið framan í."

Ætlunin er að setja upp sýningu með myndunum sem allra fyrst og „koma þar með á framfæri með beittu háði fordæmingu á þeim ruddaskap sem bresk stjórnvöld hafa sýnt í garð lítillar herlausrar vinaþjóðar."