Kvótalausi sjómaðurinn veiddi 750 kíló

„Ég er að leggja að bryggju hérna í Sandgerði en hef ekki séð „pólitíið" ennþá. Ég geri samt ráð fyrir að þeir láti sig ekki vanta eins og vanalega," segir Ásmundur Jóhannsson kvótalaus sjómaður sem fór til veiða í dag. Vísir sagði frá því fyrr í dag að Landhelgisgæslan hefði reynt að ná sambandi við Ásmund sem var við veiðar út af Garðskaga en án árangurs.

„Þeir flugu eitthvað yfir mig en ég heyri ekkert í símanum," segir Ásmundur sem var önnum kafinn við veiðar í allan dag.

„Ég má ekkert vera að því að svara símanum, ætli ég verði ekki bara að fá mér stúlku til þess að svara í símann," segir Ásmundur og hlær.

Og dagurinn gaf vel af sér hjá Ásmundi. „Ég veiddi alveg eins og ég gat, um 750 kíló," sagði Ásmundur sem mátti lítið vera að því að tala við Vísi þar sem hann var að binda bátinn sinn við bryggjuna í Sandgerði.