Samvera fjölskyldunnar besta uppeldisaðferðin

Okkar markmið er að foreldrar standi sig í uppeldinu almennt. En fyrir verslunarmannahelgina þá erum við að hvetja til þess að fjölskyldan sé saman, að samvera fjölskyldunnar sé besta uppeldisaðferðin," segir Geir Bjarnason, forvarnarfulltrúi Hafnafjarðarbæjar og einn af aðstandendum SAMAN-hópsins á vegum Lýðheilsustöðvar.

SAMAN-hópurinn reynir að minna foreldra og forráðamenn á mikilvægi þess að verja tíma með börnum sínum og hefur nú, líkt og áður, lagst í sérstaka herferð fyrir verslunarmannahelgina í ár.

SAMAN-hópurinn hefur verið starfandi frá aldamótunum „þegar menn sáu fyrir sér að öll þjóðin ætlaði á fyllirí," eins og Geir orðar það. Árangurinn af því starfi þótti góður og var í kjölfarið haldið starfinu áfram. Segir Geir að allir aðilar sjái töluverðan mun á öllu hegðunarmynstri unglinga, barna og fjölskyldna þeirra til hins betra eftir að átakinu var hrint stað.

Umhyggja og eðlilegt eftirlit

Geir gerir sér hins vegar grein fyrir því að það er erfitt verkefni að fá unglinga til að ferðast með fjölskyldum sínum um verslunarmannahelgina eða til að ferðast saman yfir höfuð. „Ég veit til þess að fullorðið fólk hafi farið með börnunum sínum á Hróarskelduhátíðina og til Eyja. Ég held því að unglingar geti farið á allar skemmtanir en þá að fjölskyldueiningin sé að fara saman. Það er samt alveg í lagi þó verið sé að slaka á taumnum þegar komið er á svona hátíðar, maður má ekki vera of mikil Grýla heldur fylgjast vel með því okkur þykir vænt um börnin okkar. Þetta kallast umhyggja og eðlilegt eftirlit. Það er í himnalagi að börn séu að fara á svona skemmtanir, við hvetjum einfaldlega fjölskylduna til að vera saman," útskýrir Geir.

„Sjálfur fer ég með fjölskylduna til útlanda yfir hátíðarnar þannig að það er tryggt að unglingarnir eru á réttum stað," segir Geir kíminn að lokum.