Ölvaður og réttindalaus á dráttarvél

Í gær var þingfest fyrir Héraðsdómi Norðurlands vestra ákæra á hendur rúmlega þrítugum karlmanni sem gefið er að sök að hafa ekið dráttarvél ökuréttindalaus og undir áfengisáhrifum sem námu 2,14 prómillum eftir vegi við Daufá í Skagafirði áleiðis að Saurbæ uns lögregla stöðvaði akstur hans.

Annar, tæplega tvítugur, var ákærður fyrir ölvunarakstur um Héraðsdalsveg í Skagafirði en þeim akstri lauk er bifreiðin hafnaði á járnhliði. Áfengismagn í blóði þess ökumanns mældist 1,52 prómill.

Þriðja manninum er samkvæmt ákæru gefið að sök að hafa gerst brotlegur við fíkniefnalöggjöfina með því að hafa falin í bifreið sinni 1,29 grömm af amfetamíni og rúm tvö grömm af kannabisefnum. Um er að ræða þrjú ótengd mál.