Telur að ráðið verði tímabundið í embætti borgarritara

Þorleifur Gunnlaugsson borgarfulltrúi Vinstri grænna telur að ,,ráðið verði tímabundið í embætti borgarritara fram að áramótum og á meðan verði staðan auglýst." Nái tillagan fram að ganga verður það í annað sinn á þremur árum sem embættið er stofnað. Stutt er síðan að Jakob Frímann Magnússon var ráðinn tímabundið sem framkvæmdastjóri miðborgarmála og olli ráðning hans talsverðu fjaðrafoki.

Ólafur F. Magnússon borgarstjóri lagði til á fundi borgarráðs í gær að embætti borgarritara verði stofnað að nýju. Því er ætlað að ,,auka skilvirkni, efla þjónustu og styrkja innviði Ráðhússins," eins og segir í tillögu Ólafs sem vísað var til stjórnkerfisnefndar sem kemur saman á mánudaginn. Gísli Marteinn Baldursson borgarfulltrúi og formaður nefndarinnar vildi ekkert láta hafa eftir varðandi málið fyrir en nefndin hefði komið saman.

Fer eftir starfandi meirihluta

Staða borgarritara var lögð niður í tíð R-listans. Eftir að meirihluti Sjálfstæðisflokks og Framsóknarflokks var myndaður var ákveðið að stofna embættið á nýjan leik. Auglýst var eftir umsóknum í júní 2007 og sóttu fjórir einstaklingar um embættið. Meirihlutinn náði ekki að stofna embættið á nýjan leik og ganga frá ráðningunni. Eftir að Tjarnarkvartettinn svokallaði var myndaður í október var hætt við allt ferlið. ,,Einfaldara og skilvirkara stjórnskipurit borgarinnar var ástæða þess að sú ákvörðun var tekin," segir Þorleifur. Hann segir jafnframt að embættið kalli á frekari fjárútlát.

Óróleiki innan borgarkerfisins

Mikill óróleiki er innan stjórnkerfis borgarinnar að mati Þorleifs. ,,Það eru búnar að vera miklar skipulagsbreytingar og óánægja meðal starfsmanna er mikil. Okkur þykir meiri ástæða til að róa þetta niður heldur en að taka embættið aftur upp."