Óvissa um umsamið lán OR vegna kreppu

Þróunarbanki Evrópu neitar að greiða lokagreiðslu umsamins láns til Orkuveitu Reykjavíkur (OR) þrátt fyrir að framkvæmdum sé lokið og úttekt hafi verið gerð á þeim. Lánið, sem tekið var vegna Hellisheiðarvirkjunar, greiðist eftir framvindu verksins. Vegna slæms efnahagsástands hér á landi vill bankinn ekki afhenda féð, rúmlega 6 milljarða króna.

Hjörleifur Kvaran, forstjóri OR, segir dráttinn á afhendingu fjárins koma sér mjög illa. „Af okkar hálfu hafa engar vanefndir orðið en þeir vilja ekki lána peninga hingað vegna ástandsins.“

Í haust samdi OR um 25 milljarða króna framkvæmdalán við Fjárfestingabanka Evrópu. Það lán fæst heldur ekki afgreitt af sömu ástæðum og hitt. Lánið var fyrst og fremst hugsað í framkvæmdir við Hverahlíðavirkjun og stækkun Hellisheiðarvirkjunar. Þeim framkvæmdum verður frestað. Þá verða engar nýjar framkvæmdir á næsta ári og dregið verður úr öðrum framkvæmdum. Er þar sérstaklega að nefna stórt og mikið fráveituverkefni á Vesturlandi, en því verður seinkað og klárað 2010 í stað 2009.

Hjörleifur segir að allt verði gert til að halda vinnu fyrir starfsfólk fyrirtækisins og engar uppsagnir séu fyrirhugaðar núna. Hluti af verkum sem áður voru boðin út, svo sem við viðhald og endurnýjun, verði nú unnin innan fyrirtækisins.

Eigið fé Orkuveitunnar rýrnar hratt. Það var 46 prósent um síðustu áramót en 21 prósent í 9 mánaða uppgjöri. „Fjárhagsleg staða okkar er engu að síður sterk,“ segir Hjörleifur. „Þó eigið fé yrði neikvætt höfum við nóg haldbært fé til að standa við skuldbindingar okkar. Ástandið þyrfti að vera mjög slæmt mjög lengi til að annað væri uppi á teningnum.“

Engin ákvæði eru í lánasamningum OR um að lánin gjaldfalli ef eigið fé verður neikvætt, líkt og tíðkast víða.

Ekki er fyrirhuguð gjaldskrárhækkun hjá Orkuveitunni. Um 50 prósent rafmagns sem OR dreifir kemur frá Landsvirkjun. „Ef Landsvirkjun hækkar, eða Landsnet hækkar flutningskostnað, kemur sú hækkun þess vegna að einhverju leyti inn hjá okkur. En við munum ekki hækka okkar rafmagn, né heita vatnið miðað við áætlanir. Ef allt fer á versta veg gæti það eðlilega breyst.“