Fundur með umhverfisráðherra vonbrigði

„Af okkar hálfu var fundurinn og svör ráðherra vonbrigði því við bjuggumst við að fá svör við ákveðnum kjarnaspurningum sem við höfðum fram að færa," segir Bergur Elías Ágústsson, sveitarstjóri Norðurþings, eftir opinn fund Þórunnar Sveinbjarnardóttur, umhverfisráðherra, á Húsavík í kvöld. Þar var tekist á um nýlegan úrskurð hennar um að áhrif fyrirhugaðs álvers á Bakka á umhverfið skuli metin heildstætt.

Bergur sagði að í raun væru helstu tíðindin af fundinum þau að engin tíðindi hafi verið af honum. Fundarmenn vildu fá svar við því hvernig þeir gætu hafið framkvæmdir við Þeistareyki á næsta ári þannig að hægt væri að komast að samkomulagi við Alcoa um byggingu álvers. Því hafi umhverfisráðherra ekki svarað.

„Aftur á móti var fínt að hún skyldi koma koma og mæta á staðinn. Við hefðum samt að sjálfsögðu viljað fá hana hingað fyrr þannig að hægt hefði verið að fara yfir verkefnið með henni. En það var fínt á fá hana á staðinn og útskýra okkar sjónarmið."

Bergur segir að næst á dagskrá sé fundur með Skipulagsráði á næstu dögum þar sem haldið verður áfram að leita svara, óvissunni verði að eyða.

Ekki náðist í umhverfisráðherra við gerð þessarar fréttar.