Lausn í sjónmáli í deilu hjúkrunarfræðinga

,,Fundinum var frestað til morguns," segir Elsa B. Friðfinnsdóttir, formaður Félags íslenskra hjúkrunarfræðinga. Fundi félagsins með samninganefnd ríkisins lauk fyrir skömmu. Elsa er bjartsýn á að málið leysist á morgun.

,,Við ætlum að hittast aftur klukkan hálf tíu í fyrramálið. Við erum að skoða ákveðnar hugmyndir sem báðir aðilar telja þess virði að vinna að. Ég er bjartsýn á að það náist niðurstaða sem er báðum aðilum hugnanleg," segir Elsa.

Hjúkrunarfræðingar hafa neitað að semja á sömu nótum og BSRB gerði á dögunum og telja að með slíkum samningi verði þeir fyrir kjaraskerðingu. Samþykkt var að boða til yfirvinnubanns frá og með 10. júlí, sem er næstkomandi fimmtudagur, hafi ekki samist fyrir þann tíma.

Nú lítur út fyrir lausn þessarar harðvítugu deilu. Elsa verður trúlega fegin að fá frí frá maraþonfundum. Spurð um stemninguna á fundunum og hvernig bakkelsi sé á borðum hlær hún og segist ekkert vilja tjá sig um matarkostinn.

"...en stemningin er góð," segir hún.