Nýtt embætti saksóknara mun rannsaka alla

Dómsmálaráðherra hefur lagt fram frumvarp til laga um embætti sérstaks saksóknara sem ætlað er að rannsaka grun um refsiverða háttsemi í aðdraganda og í tengslum við bankahrunið. Frumvarpið var lagt til á Alþingi í vikunni og hefur fengið umfjöllun í alsherjarnefnd. Samkvæmt frumvarpinu mun saksóknari rannsaka brot á refsilögum sama hver á í hlut.

Þetta staðfesti Björn Bjarnason dómsmálaráðherra í tölvupósti til Vísi. „Ef um brot á refsilögum er að ræða kemur saksóknari til skjalanna sama hver á í hlut," sagði Björn í umræddum tölvupósti.

Saksóknari mun því rannsaka jafnt opinberar stofnanir sem einkafyrirtæki í landinu. Gert er ráð fyrir að 9 starfsmenn starfi hjá hinum sérstaka saksóknara og er gert ráð fyrir kostnaði upp á 76 milljónir á ári, inni í þeirri tölu er erlend sérfræðiráðgjöf sem saksóknara er heimilt að leita eftir.