Töluvert spurt um kældan bjór í Vínbúðinni í Austurstræti

Töluvert er spurt um kaldan bjór og annað léttvín í Vínbúðinni í Austurstræti að sögn verslunarstjóra búðarinnar, Einars Jónatanssonar. Sú þjónusta að selja kælt áfengi er ekki lengur í boði í búðinni að sögn Sigrúnar Óskar Sigurðardóttur hjá ÁTVR en þjónustunni var hætt vegna beiðni frá Reykjavíkurborg.

Þangað til seinasta sumar var hægt að kaupa bjór og léttvín í kæli í Vínbúðinni í stykkjatali. Þáverandi borgarstjóri Vilhjálmur Þ. Vilhjálmsson beitti sér fyrir að því yrði hætt í átaki til þess að bæta ástandið í miðbæ Reykjavíkur.

Samkvæmt upplýsingum frá Sigrúnu eru kælar í sumum öðrum Vínbúðum. Þar er hins vegar um stærri kæla að ræða sem hægt er að setja bjór beint af brettum inn í kæli. Í Austurstræti hafi hins vegar verið lítill kælir með bjór og léttvín í stykkjatali.

Sigrún segir ekki á döfinni að setja aftur kæli í Vínbúðina í Austurstræti. Nú sé ekki aðstaða þar fyrir jafn stóra kæla og í öðrum Vínbúðum en mögulegt væri að stór kæli myndi vera settur þar ef breytingar yrðu gerðar á búðinni.

Vínbúðin er rétt við Austurvöll en þar er afar vinsælt að setjast niður í blíðskaparveðri og drekka eitthvað svalandi í sólinni, eins og kaldan bjór. Getur þá reynst leiðinlegt að aðeins sé hægt að kaupa slíkan drykk kaldan á kaffihúsum bæjarins, jafnvel þótt viðkomandi ætli ekki að nýta sér húsakost kaffihússins og á jafnvel erfitt með að taka glas út af staðnum.

Hvorki Ólafur F. Magnússon borgarstjóri né Jakob Frímann Magnússon miðborgarstjóri vildu spá til um að það að hvort kælir yrði settur aftur upp í Austurstræti.