Álit Samkeppniseftirlitsins kemur ekki á óvart

Ari Edwald, forstjóri 365 hf, fagnar áliti Samkeppniseftirlitsins um stöðu RÚV á auglýsingamarkaði og segir að hún komi sér alls ekki á óvart. Hann tekur þó fram að hann hafi að hann hafi einungis kynnt sér álitið lauslega.

„Þetta er í samræmi við raunveruleikann eins og við sem störfum á þessum markaði höfum upplifað hann og athugun Samkeppniseftirlitsins hlaut að leiða þetta i ljós," segir Ari. Hann segir það vera hörmulegt að þetta ástand hafi verið látið líðast svona lengi. Ekkert hafi verið hugað að stöðunni á auglýsingamarkaði þegar lögum um RÚV var síðast breytt þrátt fyrir fjölmargir hafi bent á ýmsa vankanta.

Ari segir að allt sem Samkeppniseftirlitið sé að benda á hafi legið fyrir þingmönnum þegar frumvarpið um RÚV ohf var til umfjöllunar í þinginu. „Og það er alveg með ólíkindum hvað þingmenn höfðu lítinn áhuga á heilbrigðum leikreglum og tilliti til samkeppni þegar á reyndi í þessu máli," segir Ari.

Vísir hefur ekki náð tali af Páli Magnússyni útvarpsstjóra vegna þessa máls.