Geiri á Goldfinger áfrýjar dómi í meiðyrðamáli

„Það var skrökvað upp á mig, það vita það allir sem lesa þetta," segir Ásgeir Davíðsson, betur þekktur sem Geiri á Goldfinger. Hann hefur áfrýjað meiðyrðamáli sínu á hendur blaðamanni og ritstjóra Vikunnar.

Elín Arnar, ritstjóri Vikunnar, og Björk Eiðsdóttir blaðamaður voru í byrjun apríl sýknaðar í héraðsdómi af meiðyrðamálinu, sem Geiri höfðaði gegn þeim fyrir umfjöllun blaðsins um nektardansstaði.

Ágreiningurinn stendur um hvort þær stöllur séu ábyrgar fyrir ummælum sem höfð eru eftir viðmælenda þeirra,  Lovísu Sigmundsdóttur, fyrrverandi nektardansmeyjar. Upprunalega stefndi Ásgeir þeim öllum þremur, en féll síðar frá kröfugerð á hendur Lovísu á þeim forsendum að rangt hefði verið eftir henni.

„Hann gerir bara það sem hann vill," segir Elín, sem hefur ekki miklar áhyggjur af málinu. „Mér finnst afar ólíklegt að Hæstiréttur komist að annarri niðurstöðu en héraðsdómur."