Fíkniefnasmyglari í endurkomubanni áfram í gæsluvarðhald

Hæstiréttur staðfesti gæsluvarðhaldsúrskurð yfir pólskum karlmanni á sextugsaldri í dag til 2.maí. Maðurinn var handtekinn 28.mars í tengslum við smygl á amfetamíni í Leifsstöð, hann reyndist þá vera í endurkomubanni.

Maðurinn var handtekinn vegna rökstudds gruns um aðild að innflutningi á umtalsverðu magni af amfetamíni en við komu til landsins með flugi frá Stokkhólmi föstudaginn 28. mars s.l. fundust í fórum samferðamanna hans, sem var pólskt par á þrítugsaldri, samanlagt 983 grömm af amfetamíni.

Skýrslum hinna kærðu beri ekki saman um fíkniefnainnflutninginn en atriði í framburði parsins þykji gefa sterka vísbendingu um að maðurinn hafi staðið að innflutningi fíkniefnanna, sem samferðafólk hans bar á sér. Eru þessi kærðu því talin í sameiningu hafa staðið að hinum ólöglega innflutningi fíkniefna.