Þarf ekki leyfi forsætisráðherra til að tjá sig

,,Það þarf eitthvað annað en að fá leyfi forsætisráðherra til að hafa skoðanir á stjórnmálum á Íslandi. Ég tel mig hafa fulla heimild til þess," sagði Gylfi Arnbjörnsson, forseti ASÍ, aðspurður um afstöðu forystumanna ríkisstjórnarinnar sem gefa lítið fyrir þau orð Gylfa að viðskipta- og fjármálaráðherra eigi að axla ábyrgð á atburðum síðustu vikna og segja af sér sem ráðherrar.

Gylfi fór fram á afsögn Björgvins G. Sigurðssonar og Árna Mathiesen í Mannamáli Sigmunds Ernis Rúnarssonar á Stöð 2 á sunnudagskvöld.

,,Mér finnst að hann eigi ekki að vera láta upp skoðanir hvernig ríkisstjórnin er samsett. Við skiptum okkur ekki af því hvernig skipað er til sætis í stjórn Alþýðusambandsins," sagði Geir H. Haarde á fundi með blaðamönnum í gær og bætti við að þetta væri mál formanna stjórnarflokkanna til að leysa úr en ekki forseta ASÍ.

Ingibjörg Sólrún Gísladóttir sagði að sér hafi fundist gagnrýni Gylfa ómakleg og hún hafi jafnframt verið órökstudd.

Gylfi sagði í samtali við Vísi að afstaða sín lægi fyrir og hann hefði ekki séð ástæðu til að breyta henni. ,,Ég er ánægður með að hafa tekist að þjappa ríkisstjórninni saman um eitthvað."

Aðspurður sagðist Gylfi ekki hafi rætt málið við Ingibjörgu Sólrúnu.