Evrópunefnd Björns sagði hugmyndir um upptöku evru án ESB aðildar óraunhæfar

Evra verður ekki tekin upp hér án aðildar að Evrópusambandinu. Þetta sagði Björn Bjarnason á heimasíðu sinni í fyrra en hefur nú skipt um skoðun. Hugmyndir hans um upptöku evru í gegnum EES eru óraunhæfar að mati Evrópunefndarinnar.

Björn Bjarnason dómsmálaráðherra viðraði á vefsvæði sínu þá hugmynd að taka upp evru í gegnum EES samninginn. Segir hann að engin lagaleg rök séu fyrir því að það verði gert og að sú hugmynd feli í sér meiri pólitíska sátt en aðild að ESB. Þessi hugmynd hefur vakið mikla athygli, ekki síst í ljósi fyrri ummæla Björns um upptöku Evru.

Þann 13. janúar í fyrra skrifaði Björn pistil á vefsvæði sitt undir heitinu Evran. Þar segir hann að evra verði ekki tekin upp hér án aðildar að Evrópusambandinu og að það sé með ólíkindum að stjórnmálamenn láti í veðri vaka að ekkert mál sé að bregðast við hagsveiflu með upptöku evru.

Jafnframt segir Björn orðrétt:

Stjórnmálamenn geta auðvitað gjaldfellt krónuna með tali af þessu tagi og valdið þannig efnahagslegum vanda. Hitt er þó líklegra, að þeir gjaldfelli svo sjálfir með ábyrgðarleysinu, að krónan standi sterkari eftir en þeir sjálfir. Tilvitnun lýkur.

Í skýrslu Evrópunefndarinnar sem forsætisráðherra skipaði, og Björn sjálfur var í forsvari fyrir var fjallað stuttlega um upptöku evru án aðildar að Evrópusambandinu.

Þar segir að raunhæfir kostir Íslands í peningamálum eru að flestra mati einungis tveir. Annars vegar núverandi fyrirkomulag og hins vegar upptaka evru samhliða aðild að ESB og myntbandalagi Evrópu. Einhliða upptaka evru eða með sérstöku samkomulagi við ESB eru óraunhæfir, að mati nefndarinnar.