Leystur undan samningi meðan hann bíður dóms

Enska 1. deildarliðið Plymouth Argyle hefur ákveðið að leysa Luke McCormick frá samningi við liðið.

McCormick er markvörður en hann bíður dóms fyrir að valda dauða tveggja ungra drengja með hættulegu aksturslagi.

McCormick ók undir áhrifum áfengis og bifreið hans var þar að auki ótryggð. Hinir látnu eru bræðurnir Arron og Ben Peak en þeir voru tíu og átta ára gamlir.

Atvikið átti sér stað í síðasta mánuði en McCormick, sem er 24 ára, mun mæta í dómssalinn næst þann 8. september.