Sjúkraliðar samþykkja samning við SFH

Samningur Sjúkraliðafélags Íslands við Samtök fyrirtækja í heilbrigðisþjónustu (SFH) var samþykktur með meirihluta atkvæða í rafrænni atkvæðagreiðslu.

Þetta kemur fram á heimasíðu BSRB. Tæplega 38 prósent félagsmanna neyttu atkvæðisréttar síns og sögðu 81 prósent þeirra já við samningnum en 18 prósent nei. Skrifað var undir samkomulag við Samtök fyrirtækja í heilbrigðisþjónustu fyrir um tveimur vikum og felur samningurinn í sér sömu kjarabætur og BSRB samdi um við fjármálaráðuneytið í lok maí.

Þá hafa sjúkraliðar sem starfa hjá Reykjavíkurborg samþykkt á kynningarfundi samning við Reykjavíkurborg, en hann er jafnframt sambærilegur við samninginn við ríkið.