Segir góða loðnuveiði fyrir innan Tvísker

Mikla loðnu virðist vera að finna fyrir innan Tvísker fyrir austan Ingólfshöfða að sögn sjómanns sem þar var við veiðar.

Vísir náði tali af Magnúsi Jónassyni, fyrsta stýrimanni á Sighvati Bjarnasyni VE, fyrir stundu. Skipið var á leið í land með 450 tonn af loðnu sem fékkst í einu kasti á þessu svæði. Að sögn Magnúsar eru fleiri skip á svæðinu og hafa þau einnig náð góðum köstum. „Torfan var tvær mílur á lengd og 1,8 á breidd," segir Magnús og gefur lítið fyrir það enga loðnu sé að finna. Aðspurður segir hann að skipverjar á Sighvati Bjarnasyni hafi ekki komið auga á hafrannsóknaskip á svæðinu.

Beðið er eftir því að Hafrannsóknastofnun ljúki mælingu sinni á stærð loðnustofnsins en fyrr í dag kom fram að allt útlit væri fyrir að loðnuveiðin yrði stöðvuð í dag vegna þess að stofninn er í mikilli lægð. Slík ákvörðun er talin geta kostað útvegsfyrirtæki, sjómenn og byggðarlög milljarðatap.

Magnús segir að sjómönnum lítist ekki illa á stöðuna. „Loðnan er þarna til staðar og menn verða að átta sig á því að þetta er fiskur sem er óútreiknanlegur í hegðun," segir Magnús.