Frikki mun taka alla þessa kúkalabba í fjósið, segir Sverrir

"Ég hef fylgst af alveg gríðarlegum áhuga með hinni miklu og stórbrotnu sigurgöngu Eurobandsins í Serbíu. Áhugi minn er óslökkvandi á öllu sem þeim viðkemur. Ég las einhversstaðar að þau hefðu verið gasalega vinsæl á einhverri sveitabjórkrá og ennþá vinsælli á einhverju flottu götuhorni þarna úti og það er ekki svo lítið," segir Sverrir Stormsker aðspurður um hans skoðun á Eurobandinu sem keppir fyrir Íslands hönd í Eurovision í ár.

"Svo var víst einhver latexbakpoki sem bað Frikka um eiginhandaráritun á gasalega vinsælu almenningssalerni þannig að mér sýnist þau bara vera búin að slá rækilega í gegn og meika það svo um munar."

"Samkvæmt þessu þá mala þau náttúrulega keppnina. Svo skilst mér að þau séu líka búin að vera á fullu í ræktinni og séu samanlagt komin niður í 200 kíló og ekki skemmir það fyrir. Það gæti meiraðsegja gert gæfumuninn í keppni sem þessari, ég tala nú ekki um ef þau verða þar að auki bæði brjóstahaldaralaus og í litríkum fötum með mikið glimmer í andlitinu og ennþá meira gel í hárinu og gríðarlega mikið meik í kringum augun."

"Þá náttúrulega pakka þau þessu saman. Pottþétt mál. Verst að ég man ekkert eftir laginu en það er auðvitað aukaatriði. Ég ætla að veðja aleigunni á þau. Þau munu rúlla þessu upp. Frikki mun taka alla þessa kúkalabba í fjósið. Ekki nokkur einasta spurning," segir Sverrir Stormsker sem ásamt Stefáni Hilmarssyni var valinn fulltrúi Íslendinga í Eurovision árið 1988 með lagið Þú og þeir (Socrates).

Lagið lenti í 16. sæti og vinningslagið það ár var frá Sviss, Ne Partez Pas Sans Moi.

Socrates á Youtube