Gætu orðið Íslendingum til skammar

„Það er mjög alvarlegt ef hringlandahátturinn í borgarstjórnarflokki Sjálfstæðisflokksins er farinn að verða okkur Íslendingum til skammar á alþjóðavettvangi," segir í orðsendingu frá Sigrúnu Elsu Smáradóttur, fulltrúa Samfylkingarinnar í stjórn Orkuveitu Reykjavíkur.

Sigrún segir að síðan Kjartan Magnússon borgarfulltrúi Sjálfstæðismanna hafi tekið við sem stjórnarformaður REI hafi fjölmargar viljayfirlýsingar verið undirritaðar víðsvegar um heiminn.

Hún bendir á að skrifað hafi verð undir viljayfirlýsingu við Eþíópíu. Í Djibuti hafi svo verið skrifað undir tvíþætta samninga. Annarsvegar um að ráðast í hagkvæmniathugun, þar sem boðin verði út borun á allt að fimm tilraunaborholum til að kanna efnasamsetningu og kraft svæðisins. Hins vegar hafi verið skrifað undir drög að samningi um virkjun í kjölfarið, reynist niðurstaða tilraunaborunnar jákvæð. Í sömu ferð hafi verið skrifað undir viljayfirlýsingu í Jemen og nú sé forstjóri REI í Alaska að kanna möguleika í virkjunarframkvæmdum þar.

„Yfirlýsingar stjórnarformanns REI eftir heimkomu sína, um að Orkuveitan sé að hægja á útrás sinni og dragi sig út úr verkefnum, ganga því þvert á hans eigin störf og athafnir. Auk þess sem hugleiðingar hans um einkavæðingu og hugsanlega sölu á REI ganga þvert á stefnu borgaryfirvalda sem sameiginleg niðurstaða náðist um í Stýrihópi borgarráðs fyrir nokkrum vikum síðan," segir Sigrún Elsa.

Sigrún Elsa segir að Íslendingar verði sér til skammar á alþjóðavettvangi dragi REI sig út úr verkefninu í Djibuti vegna duttlunga borgarstjórnarflokks sjálfstæðismanna. Nú þegar sé búið er að vekja miklar væntingar heimamanna í Djibuti og blanda alþjóðlegum bönkum í málið.

Sigrún Elsa segir að Kjartan Magnússon, stjórnarformaður REI, verði að standa við gefnar yfirlýsingar og læra að standa í lappirnar gagnvart upphlaupum í röðum sjálfstæðismanna í borginni ætli hann sér önnur eftirmæli í pólitík en að hafa klúðrað íslensku orkuútrásinni.