Þriðjungur framhalds- og háskólanema vill í strætó

Sex þúsund nemar hafa skilað inn umsókn um nemakort Strætós á þeim þremur vikum sem liðnar eru frá því að opnað var fyrir umsóknir. Þá hafa fjögur þúsund til viðbótar hafið umsóknarferlið á Netinu en það er í fjórum skrefum og endar með því að senda inn mynd af korthafa til að prenta á kortið.

Í tilkynningu frá Strætó segir að því hafi um tíu þúsund framhalds- og háskólanemar, um það bil þriðjungur allra nema á höfuðborgarsvæðinu, sótt um kortið. Þetta er annað árið sem sveitarfélög á höfuðborgarsvæðinu bjóða nemendum framhalds- og háskóla frítt í strætó yfir veturinn. Að þessu sinni eru það Reykjavík, Hafnarfjörður, Kópavogur, Seltjarnarnes, Mosfellsbær og Álftanes sem taka þátt í verkefninu.

„Við erum ánægð með viðtökurnar hingað til og áhuga nemenda á að nýta sér þessa þjónustu sem sveitarfélögin bjóða upp á. Fjöldi umsókna er í samræmi við áætlanir okkar og ljóst að margir nemendur á höfuðborgarsvæðinu eru afar áhugasamir um að nýta sér strætó sem valkost við einkabílinn," er haft eftir Reyni Jónssyni, framkvæmdastjóra Strætós bs., í tilkynningu byggðasamlagsins.

Hægt er að sækja um kortin á vefnum strætó.is, en sú breyting hefur orðið á útgáfu kortanna frá því á síðasta ári að nemakortin eru framleidd með mynd af korthafa til að auðvelda notkun þeirra í strætisvögnunum.