Óskar fékk besta vin sinn til að stjórna OR

„Það er stórfrétt að Óskar Bergsson skuli velja besta vin sinn í stjórnarformennsku hjá Orkuveitu Reykjavíkur," segir Björk Vilhelmsdóttir, borgarfulltrúi Samfylkingarinnar. Hún bendir á að það hafi ekki reynst vel þegar að Vilhjálmur Þ. Vilhjálmsson valdi Hauk Leósson, besta vin sinn, sem stjórnarformann.

„Þetta er nákvæmlega sami leikur," segir Björk. „Það er verið að fá einkavin eins manns í Framsóknarflokknum til að stýra stærsta fyrirtæki borgarinnar," bætir Björk við. Hún segist ekki vita til þess að hann hafi neina þekkingu á orkumálum. Það eina sem hún viti sé að hann hafi starfað sem verkefnisstjóri hjá Úrvinnslusjóði.

„Þetta er fyrirtæki sem er að velta tugum milljarða og þarna á sérfræðingur að ráða ríkjum," segir Björk. Björk segir að þetta séu mjög alvarleg svik við eigendur Orkuveitu Reykjavíkur sem séu fyrst og fremst borgarbúar.