Geir fundaði með Cameron og Hague

Geir H. Haarde forsætisráðherra átti í dag fund með David Cameron, leiðtoga breska Íhaldsflokksins, og William Hague, talsmanni flokksins í utanríkismálum.

Fram kemur í tilkynningu forsætisráðuneytinu að á fundinum hafi verið fjallað um þróun alþjóðlegra efnahagsmála og áhrif hennar á Íslandi og í Bretlandi. Í því samhengi var skipst á skoðunum um Evrópumál, stöðu EES og horfur innan ESB.

Þá voru rædd varnarmál Íslands og alþjóðleg öryggismál, þar á meðal ástandið í Afganistan. Einnig var rætt um orku og umhverfismál, hvalveiðar, og loks um samstarf Sjálfstæðisflokksins og Íhaldsflokksins.