Meirihluti endurkrafna á tjónvalda í umferðinni vegna ölvunaraksturs

Samtals bárust endurkröfunarnefnd 88 ný mál til úrskurðar á árinu 2007 á hendur þeim sem tjóni ollu af ásetningi eða stórkostlegu gáleysi. Langflestar kröfunnar voru vegna ölvunaraksturs.

Ölvun ástæða í 62% tilvika

Vátryggingafélög geta eignast þennan endurkröfurétt af greiddu tjóni samkvæmt umferðarlögum.

Af málunum 88 samþykkti nefndin, sem skipuð er af Viðskiptaráðherra, endurkröfu að öllu leyti eða að hluta í 71 máli. Á árinu 2006 var heildarfjöldi mála á hinn bóginn 103, og samþykktar endurkröfur að öllu eða einhverju leyti 98.

Ástæður endurkröfu eru langoftast ölvun tjónvalds, eða í 44 tilvikum. Lyfjaáhrif var ástæða endurkröfu í fjórum tilvikum, í átján málum voru ökumenn endurkrafðir sökum ökuréttindaleysis, vegna beins ásetnings voru tveir ökumenn endurkrafðir og loks fyrir stórkostlega vítavert aksturslag eða glæfraakstur voru sex ökumenn endurkrafðir. Í sumum málum voru ástæður endurkröfu fleiri en ein.

Hærri endurkröfugreiðsla þrátt fyrir færri mál

Samtals nema þessar endurkröfur tæplega 42.5 milljónum króna og er þá einnig tekið tillit til viðbótarendurkrafna í eldri málum. Tvær hæstu endurkröfurnar námu 3.5 milljónum króna hvor árið 2007 og sú næsthæsta nam þremur milljónum króna. Alls voru tólf endurkröfur fimm hundruð þúsund krónur eða meira á árinu 2007. Á árinu 2006 námu hins vegar samþykktar endurkröfur alls tæplega 29 milljónum króna.

Af hinum endurkröfðu tjónvöldum voru karlar 61 en konur voru tíu, eða um 14%. Hlutur kvenna í málum af þessu tagi var hins vegar 21% á árinu 2006.

Ökumenn 25 ára og yngri áttu hlut að um 48% mála en áttu 42% mála árið 2006.