Hafna úreltum hugmyndum um orkuflutninga

Sveitastjórnarfulltrúar Vinstri grænna og Sjálfstæðisflokksins í Skagafirði telja ekki annað koma til greina en að leggja nýja háspennulínu yfir héraðið í jörð og setja spurningamerki við umfang framkvæmdanna. Þetta kemur fram í tilkynningu.

Páll Dagbjartsson, Sjálfstæðisflokki, og Bjarni Jónsson, Vinstri grænum, kynntu afstöðu sína gagnvart áformum Landsnets um lagningu háspennulínu frá Blöndustöð til Akureyrar á byggðaráðsfundi.

Flokkarnir eru í minnihluta í sveitarfélaginu en fjórir bæjarfulltrúar Framsóknarflokksins og einn bæjarfulltrúi Samfylkingarinnar mynda meirihluta í Skagafirði.

,,Við höfnum þeim áformum Landsnets að leggja háspennulínu (loftlínu) með tilheyrandi burðarmöstrum þvert í gegn um Skagafjarðarhérað, einkum þó þá hugmynd að flytja línuna á nýtt línustæði. Við teljum þau viðhorf úrelt, sem hér eru uppi, að leggja slíkar línur þvert í gegn um blómleg byggðalög," segir í bókun Páls og Bjarna.

Að þeirra mati er eina ásættanlega leiðin að leggja línuna í jörðu. Búsetuskilyrði og ímynd héraðsins getur orðið fyrir skaða. ,,Hægt er að ná tilsettum markmiðum um orkuflutninga og framkvæmdakostnað ásamt því að lágmarka neikvæð áhrif á náttúru og samfélag með því að miða við lægri spennu og leggja nýja byggðalínu í jörð."