Óskar: Guðlaugur af sama sauðahúsi og ég

Guðlaugur Sverrisson er vanur að takast á við krefjandi verkefni og skila þeim af sér með sóma, að sögn Óskars Bergssonar, borgarfulltrúa Framsóknarflokksins. Óskar segir að ef menn skoði þann lista sem hann hafi lagt fram yfir menn í nefndir borgarinnar komi í ljós að það sé að langstærstu leyti harðasti kjarninn í Framsóknarflokknum.

„Guðlaugur er þar fremstur meðal jafningja. Hann er af sama sauðahúsi og ég. Hann er iðnaðarmaður með háskólapróf í viðskiptafræði og hefur reynslu úr stjórnsýslunni," segir Óskar. Hann segir að Guðlaugur sé arkitektinn á bak við Úrvinnslusjóð. Hann hafi verið starfsmaður í umhverfisráðuneytinu áður en Úrvinnslusjóður varð að veruleika og unnið að stofnun hans ásamt öðrum.