Fær ekki aðgang að framburði fórnarlambs í nauðgunarmáli

Greint var frá málinu á dögunum og þar kom fram að maðurinn sæti í gæsluvarðhaldi vegna málsins. Hann er nú laus og í úrskurði Hæstaréttar í dag var því ekki tekin afstaða til kröfu mannsins um að gæsluvarðhaldsúrskurðurinn yrði felldur úr gildi.

Hins vegar var fjallað um kröfu verjandans um aðgang að framburðarskýrslu konunnar hjá lögreglunni á Akureyri en lögregla vildi ekki veita aðganginn vegna þess hve rannsókn er skammt á veg komin. Féllst bæði Héraðsdómur Norðurlands eystra og Hæstiréttur á kröfu sýslumanns um að verjandinn fengi ekki skýrsluna fyrr en 28. ágúst.

Fram kemur í úrskurði Hæstaréttar að konan hafi verið undirmaður mannsins og að hann hafi neitað sök við yfirheyrslu hjá lögreglu. Í frétt Stöðvar 2 af málinu kom fram að maðurinn væri um sjötugt og konan um þrítugt.