Breyttar áherslur með nýjum málefnasamningi

Það hillir undir Bitruvirkjun og ákvörðun um framtíðarstaðsetningu Reykjavíkurflugvallar, samkvæmt málefnasamningi meirihlutans sem tók við Reykjavíkurborg í dag. Ekkert bendir til að kapp verði lagt á að varðveita nítjándu aldar götumynd Laugavegarins.

Sjö mánuðir eru síðan Sjálfstæðismenn og Frjálslyndir kynntu það sem þeir hygðust gera fyrir borgina. Í dag lögðu Sjálfstæðismenn og Framsóknarflokkur fram sinn nýja málefnasamning. Samningarnir tveir eru keimlíkir að sumu leyti, í báðum er rætt um framboð lóða fyrir fjölskyldur og fyrirtæki og almennt orðuð markmið um betri þjónustu við fjölskyldur og eldri borgara. Hins vegar greinir þá í sundur í mikilvægum málum.

Nýtt í málefnasamningi dagsins er:

- að aðgerðaráætlun vegna breytinga í fjármála- og atvinnuumhverfi verður lögð fram fyrir 1. október.

-loftslagsáætlun fyrir Reykjavík á að liggja fyrir innan árs.

- sátt hefur náðst um útrás Orkuveitunnar, eins og áður hefur verið greint frá, með stofnun fjárfestingarsjóðs.

Þrennt í nýja málefnasamningnum er á skjön við fyrirætlanir síðasta meirihluta Sjálfstæðismanna með Ólafi F.:

- í fyrsta lagi að rannsóknir vegna Bitruvirkjunar hefjast á ný. Hvergi var minnst á Bitru í síðasta samningi - enda öllum ljós andstaða fyrrverandi borgarstjóra við þá virkjun.

- í öðru lagi þögnin um margrædda nítjándu aldar götumynd Laugavegarins, sem var ofarlega á lista síðasta meirihluta, en er nú hvergi nefnd á nafn.

-í þriðja lagi er hvergi minnst á lækkun skatta eins og fyrir sjö mánuðum. Þá hugðist meirihlutinn lækka fasteignaskatta á íbúðarhúsnæði - sem hann gerði, um fimm prósent. Einnig átti að hækka tekjumörk fyrir niðurfellingu fasteignaskatta hjá elli- og örorkulífeyrisþegum - það var ekki gert.

- Og síðast en ekki síst ætlar nýi meirihlutinn strax í haust að óska eftir viðræðum við ríkisvaldið um framtíðarstaðsetningu innanlandsflugvallar. Fyrir sjö mánuðum ákváðu Ólafur og Sjálfstæðismenn hins vegar að ákveða ekki flutning Reykjavíkurflugvallar.

Hér er hlaupið yfir verkefnalista nýja meirihlutans, og er hreint ekki tæmandi því málefnasamningur fyrsta meirihluta þessa kjörtímabils er í fullu gildi. Hvort að Óskar Bergsson er til dæmis jafn umhugað um upptöku skólabúninga og forveri hans, Björn Ingi Hrafnsson, á til að mynda eftir að koma í ljós.