Innbrot upplýst með samvinnu lögregluumdæma

Brotist var inn hjá þremur fyrirtækjum í Búðardal aðfaranótt miðvikudagsins 20. ágúst síðastliðinn. Stolið var bæði peningum og verkfærum. Í kjölfarið hófst vinna lögreglunnar í Borgarfirði og Dölum við að upplýsa innbrotin og taldi lögreglan á Snæfellsnesi möguleika á því að aðilar í umdæmi hennar tengdust innbrotunum. Hófst þá samvinna lögregluliðanna við að upplýsa innbrotin.

Lögreglan í Borgarfirði og Dölum stöðvaði bifreið á Snæfellsnesvegi í gær, sem var að koma af Snæfellsnesi. Í bifreiðinni fundust verkfæri, sem lögreglumenn töldu tengjast innbrotunum, ásamt töluverðu af peningaseðlum. Ökumaðurinn var handtekinn og færður á lögreglustöðina í Borgarnesi.

Eftir að fenginn var úrskurður héraðsdómara gerði lögreglan á Snæfellsnesi og lögreglan í Borgarfirði og Dölum húsleit í tveimur íbúðum á Hellissandi og einni bílgeymslu í Ólafsvík og handtók karl og konu grunuð um aðild að málinu. Í bílgeymslunni fannst hluti af þýfinu úr innbrotunum í Búðardal.

Við yfirheyrslur viðurkenndi ökumaðurinn, sem lögreglan í Borgarfirði og Dölum handtók á Snæfellsnesvegi, og karlinn, sem lögreglan á Snæfellsnesi handtók við húsleitina, að hafa brotist inn í fyrirtækin í Búðardal og stolið þaðan peningum og verkfærum. Þá lagði lögreglan hald á eitt ólöglegt skotvopn sem fannst við húsleitina.

Rannsóknin við að upplýsa þessi innbrot er til marks um þá góðu samvinnu, sem er á milli lögreglunnar í Borgarfirði og Dölum og lögreglunnar á Snæfellsnesi.

Frá þessu er sagt á fréttavef lögreglunnar.