7500 skráðir í Reykjavíkurmaraþon

Sjö þúsund og fimm hundruð manns höfðu skráð sig til þátttöku í Reykjavíkurmaraþoni Glitnis þegar netskráningu lauk klukkan átta í morgun.

Fram kemur í tilkynningu frá aðstandendum hlaupsins að þegar netskráningu hafi lokið í fyrra hefðu 8.300 skráð sig en sú netskráning stóð 16 klukkustundum lengur. Forsvarsmenn maraþonsins vekja athygli á að það gæti orðið uppselt í fjölmennum greinum og því rétt að vera snemma á ferðinni í Laugardalshöllinni á morgun þegar skráning heldur áfram. Opið verður í Höllinni frá kl. 9 -21 á morgun.

Nú þegar hafa 633 skráð sig í heilt maraþon og er þegar ljóst að þar er um metþátttöku að ræða en í fyrra voru 565 skráðir. „Þetta er klár vísbending um að þátttaka í lengri vegalengdum fer vaxandi og sífellt fleiri gera hlaup að lífstíl sínum og setja sér markmið um að fara lengra en áður en væntanlega ætla líka einhverjir að bæta tímann sinn," segir í tilkynningunni.

Þá eru tæplega 1200 skráðir í hálft maraþon, um 2500 skráðir í 10 kílómetra hlaup og um 1200 í þriggja kílómetra hlaup. Enn fremur hafa um 1900 börn skráð sig í Latabæjarhlaupið sem fer fram við Háskóla Íslands.