Raddir fyrir Tíbet ekki þagnaðar

Nokkur vonbrigði urðu með aðsókn á samkomuna Raddir fyrir Tíbet sem samtökin Vinir Tíbets stóðu fyrir 24. ágúst, síðasta dag Ólympíuleikanna í Peking. Birgitta Jónsdóttir, formaður samtakanna, lætur þó ekki deigan síga og hyggst halda söfnuninni opinni til 15. september en tilgangur Radda fyrir Tíbet, sem var tónlistarviðburður í Salnum í Kópavogi, var að safna fé fyrir flóttamannamiðstöðina í Dharamsala á Indlandi. Meðal þeirra sem komu fram á samkomunni var Páll Óskar Hjálmtýsson sem gaf vinnu sínu auk þess að gefa fé í söfnunina.

„Ástandið í Tíbet hefur aldrei verið eins slæmt og núna," útskýrir Birgitta. Hún hefur það eftir einni frægustu skáldkonu Tíbets, sem nýverið flúði frá landinu eftir handtöku og aðrar þrengingar, að ótti almennings hafi aldrei verið jafnlamandi sem nú. „Það er kerfisbundið verið að brjóta niður menningu Tíbeta, það liggur við að á hverjum degi glatist eitthvað," bætir Birgitta við og segir frá hetjulegum flótta Tíbeta frá landinu um hrjóstrugt fjalllendi í nístingskulda.

Ekki komast allir lifandi úr þeirri svaðilför en fjöldi tíbetskra flóttamanna hefur nú fundið athvarf í Dharamsala á Indlandi en örnefnið þýðir reyndar bókstaflega hvíldarstaður. Svo margir brottflúnir Tíbetar eru saman komnir í Dharamsala að staðurinn er stundum nefndur Litla-Lhasa en Lhasa er höfuðborg Tíbets.

Sem fyrr segir stendur söfnunin fyrir flóttamannamiðstöðina í Dharamsala til 15. september og er reikningsnúmerið eftirfarandi: 0137-05-066046, kennitala 121072-2979.