Nýir orkugjafar og nýsköpun eru framtíðin

Össur Skarphéðinsson iðnaðarráðherra lagði áherslu á nýja orkugjafa og nýsköpun í landinu í ræðu sinni á eldhúsdegi Alþingis í kvöld.

Hann hafnaði þeim fullyrðingum Guðna Ágústssonar, formanns Framsóknarflokksins, að ríkisstjórnin væri hölt og vísaði til stöðu Framsóknarflokksins á landsvísu. Þá sagði hann ríkisstjórnina hafa ráðist í mestu jöfnunaraðgerðir sem nokkur ríkisstjórn hefði ráðist í og tölurnar töluðu sínu málið. Aðgerðirnar myndu skila níu þúsund milljónum á ári til aldraðra, barna og öryrkja.

Stjórnarsamstarf gengið vonum framar

Össur sagði samstarf ríkisstjórnarflokkanna hafa gengið vonum framar og stjórnarliðar hefðu verið einhuga í verkum sínum þrátt fyrir einstaka núning. Forystumenn ríkisstjórnar hefðu sýnt styrk með því að glíma við vandann í efnahagslífinu af festu, þar á meðal með mótvægisaðgerðum vegna skerðingar og þorskkvóta. Verkefnið nú væri að kveða niður verðbógludrauginn og Íslendingum hefði alltaf borið gæfa til þess að snúa bökum saman í þeirri baráttu.

Össur sagði að á undanförnum árum hefðu mestar deilur í samfélaginu risið um virkjanir og stóriðju. Ríkisstjórnin hefði reynt að ná sátt í þessum málum með ýmsum aðgerðum, meðal annars með því taka frá nokkra staði sem ekki yrði farið inn á og búa til stjórntæki til þess að tryggja að óspilltri náttúru verði ekki spillt.

Sagðist hann telja að skapast væri breið samstaða um að auðlindir landsins mætti ekki selja og auðlindir yrðu í eigu sveitarstjórna og ríkisins. Þetta væri að mati hans eitt mikilvægasta mál sem komið hefði inn á Alþingi.

Nýja atvinnulífið er framtíðin

Þá sagði Össur að ríkisstjórnin myndi beita sér fyrir þróun orkugjafa í stað dýrs bensíns og olíu og að því væri unnið í iðnaðaráðuneytinu. Íslendingar hefðu ákveðið forskot í þessum efnum og ættu að gera sig klára fyrir orkuskipti á bíla og báta. Nefndi hann vetni, etanól og metanól í þeim efnum.

Þá sagði hann nýja atvinnulífið framtíðina. Ríkisstjórnin hefði lagt mikla áherslu á að bæta aðstæður sprotafyrirtækja því þau væru framtíðin. Nefndi hann að á morgun ætti að tilkynna stofnun yfir fjögurra milljarða samráðssjóðs stjórnvalda og atvinnulífs sem styðja ætti sprotafyrirtæki.