Ég fór á fyllerí, Eiður fór að sofa

Breska blaðið Sun birti skemmtilegt viðtal við knattspyrnumanninn Danny Brown um helgina þar sem hann rifjar upp hvernig stór mistök eyðilögðu stóra tækifærið hans fyrir áratug.

Brown er 27 ára gamall og er fyrirliði neðrideildarliðsins Cambridge United. Lið hans féll úr enska bikarnum í gær þegar það tapaði 2-1 fyrir Wolves, en ef liðið hefði óvænt komist áfram í keppninni - hefði Brown örugglega fagnað manna minnst.

Í viðtali við Sun rifjar hann nefnilega upp hvernig glappaskot sem hann gerði þegar hann var 17 ára gerði út um stóra tækifærið hans.

Fyrir 10 árum var Brown þannig unglingaliðsmaður hjá Leyton Orient og var ekki einu sinni kominn í aðalliðið þar þegar útsendarar Bolton komu auga á hann og vildu kaupa hann fyrir stórfé og fá hann í úrvalsdeildina.

Þarna var stóra tækifærið komið og Brown var komið fyrir á hótelherbergi við hliðina á Eiði Smára Guðjohnsen sem þá var að stíga sín fyrstu skref með liðinu.

"Ég fór til Bolton til að skoða aðstæður og hitta stjórann, Colin Todd. Hann kom mér fyrir á hóteli með Eiði Guðjohnsen og sagði mér að hafa ekki áhyggjur af hótelreikningnum - félagið myndi sjá um hann. Ég var aðeins 17 ára gamall og var í fyrsta skipti á ferlinum að smakka á velgengni."

"Ég ákvað því að hringja í nokkra félaga mína og halda upp á þetta. Við héldum partí á hótelinu þrátt fyrir að nokkrir af okkur væru ekki nógu gamlir til að drekka. Það stóð yfir í nokkra daga og ég pældi ekkert í því fyrr en ég fékk símtal og var boðaður á fund með stjóranum," sagði Brown, sem fljótlega vaknaði upp af draumnum.

Svíður að sjá Eið spila með Barcelona

"Hann sýndi mér hótelreikninginn og bað mig að útskýra reikning upp á 7,500 pund (916,000 krónur). Mér krossbrá af því ég hélt að reikningurinn væri tíu sinnum lægri. Ég trúði þessu ekki, en stjórinn sagði mér að koma mér aftur til London og ég gleymi aldrei því sem hann sagði við mig. Hann sagði ´þetta gekk allt svo vel hjá þér þangað til við sáum hótelreikninginn´"

Brown var sendur aftur til Orient með skottið milli lappanna og þurfti þar að útskýra kjánalega sögu sína fyrir gamla þjálfaranum sínum, en félagið hafði vonast til þess að fá góðan pening fyrir söluna á Brown.

"Stjórinn trúði því ekki þegar ég sagði honum söguna mína. Hann fékk áfall," sagði Brown, sem síðan hefur spilað áfram með liðum í neðri deildunum á Englandi.

"Ég er slæmt fordæmi fyrir alla unga atvinnumenn sem halda að þeir geti fengið allt upp í hendurnar og í hvert skipti sem umboðsmaður minn lendir í vandræðum með unga leikmenn - biður hann mig að tala við þá. Ég segi þeim þá að ástæða þess að Eiður Smári Guðjohnsen náði árangri en ekki ég - sé sú að hann fór að sofa á kvöldin þessa örlagaríku daga en ekki ég," sagði Brown en bætir við að hann sé ekki sami maðurinn í dag.