Siðareglur borgarfulltrúa að verða til

Vinnu starfshóps sem skipaður var til að ljúka við gerð siðareglna borgarfulltrúa gengur vel, að sögn Hönnu Birnu Kristjánsdóttur borgarstjóra.

,,Hópurinn hefur verið að draga að sér gögn og vinna úr þeim. Áætlanir um að ljúka störfum 1. desember munu standa," segir Hanna Birna í samtali við Vísi.

Starfshópurinn var skipaður af borgarráði 28. ágúst í kjölfar umræðu um siðareglur borgarfulltrúa og annarra kjörinna fulltrúa. Með reglunum er ætlunin að tryggja að kjörnir fulltrúar í borgarstjórn gangi ekki annarra hagsmuna í störfum sínum en þeirra sem þeir eru kosnir til.

Þegar starfshópurinn var skipaður í ágúst lágu fyrir ýmis undirbúningsgögn og drög að siðareglum frá fyrri starfshópum. Hópurinn skal skila niðurstöðu eigi síðar en 1. desember næstkomandi.

Magnús Þór Gylfason, aðstoðarmaður borgarstjóra, fer fyrir vinnu starfshópsins. Í honum sitja einnig borgarfulltrúarnir Dagur B. Eggertsson, Gísli Marteinn Baldursson, Svandís Svavarsdóttir og Þorbjörg Helga Vigfúsdóttir.